Oorlogswinter

Tachteg joar noa bevrijden van Nederland verschient roman Oorlogswinter van Jan Terlouw ien n Grunneger vertoalen van Marten van Dijken.

t Bouk gaait over Michiel, n jong van 16 joar. t Verhoal speult zuk òf ien Twijde Wereldoorlog, ien routkolde oorlogs-winter van 1944-1945. Mensken oet t Westen trekken ien laange riegen veur Michiel zien olderliek hoes laans, op zuik noar eten. Michiel helpt ze zoveul meugelk, net as Jan Terlouw dat destieds doan het dou hai oorlog mitmouk.
Dick, Michiel zien buurjong, zit ien t verzet. Hai beroamt, mit twij aandern, n overvaal op n postkantoor. Mor t spul is verroaden en Dick wordt oppakt deur Duutsers. Zo rakt Michiel en zien zuster Erica, betrokken bie t verzörgen van n Engelse piloot. Dij is mit zien vlaigtuug deelschoten en deur Dick bezied holden ien n hool ien t bos.
Goandeweg krigt Michiel aal meer te moaken mit t verzet tegen Duutsers. t Haile bouk deur vragt hai hom òf: wèl is te vertraauwen en wèl nait. Elk kin n verroader wezen. Hai onderviendt dat oorlog nait spannend is, zo as e eerst dochde, mor aldervrezelkst.

En nog altied wordt ter vochten en is oorlog veur veul mensken nait verbie. Ien zien veurwoord schrift Jan Terlouw: ‘Herinneringen aan de oorlog mogen niet verdwijnen, ieder boek over de oorlog moet aansporen om oorlogen te voorkomen. Ik hoop en vertrouw dat deze Groninger editie daar ook weer aan bij mag dragen.’